Ҫуркуннепе хура вӑрман симӗс тумланать,
Ӑшӑ ҫилӗ вӗрнипеле лӑпкӑн хумханать.
Асл(ӑ) уҫланкӑ варрийӗнче куккук авӑтать,
Сарӑ хӗрӗ итле-итле, хурланса утать.
Асл(ӑ) уҫланкӑ варрийӗнче куккук авӑтать,
Сарӑ хӗрӗ итле-итле, хурланса утать.

«Ма ҫӳретӗн эсӗ кунта, пикеҫӗм, пӗччен
Ҫӗмӗрт хӑйӗн шур ҫеҫкине ҫурнӑ вӑхӑтра?
Унӑн шурӑ чечеккине татас тетӗн-и,
Хӑв юратнӑ савнӑ тусна парнелесшӗн-и?
Унӑн шурӑ чечеккине татас тетӗн-и,
Хӑв юратнӑ савнӑ тусна парнелесшӗн-и?»

«Эп савнине ӑсатса ятӑм ҫак уҫланкӑра,
Ҫӗмӗрт хӑйӗн шур ҫеҫкине ҫурнӑ вӑхӑтра.
Вӑл ҫӗршывшӑн пуҫне хучӗ юнлӑ вӑрҫӑра,
«Куккук пулса вӗҫеп, — терӗ, — ҫак уҫланкӑна».
Вӑл ҫӗршывшӑн пуҫне хучӗ юнлӑ вӑрҫӑра,
«Куккук пулса вӗҫеп, — терӗ, — ҫак уҫланкӑна»